Kajal Aggarwal: దక్షిణాది అగ్ర నటి కాజల్ అగర్వాల్ నటించిన హర్రర్ సినిమా ‘కాజల్ కార్తీక’. ప్రముఖ దర్శకుడు డీకే ద‌ర్శ‌క‌త్వంలో కరుంగాపియ‌మ్ పేరుతో త‌మిళంలో రూపొందిన సినిమాను ‘కాజల్ కార్తీక’ పేరుతో తెలుగులోకి డ‌బ్ చేశారు. ఐదు క‌థ‌ల‌తో ఆంథాల‌జీగా తెర‌కెక్కిన ఈ సినిమాలో కాజల్ అగ‌ర్వాల్‌తో పాటు రెజీనా, జనని, రైజా విల్సన్, అలానే ఇరానియన్ నటి నోయ్రికా తదితరులు ప్రధాన పాత్రలు పోషించారు. ఈ సినిమాకి ప్రసాద్‌ ఎస్‌ఎన్‌ సంగీతం అందించారు. పేవ్ ఎంటర్‌టైన్‌ మెంట్స్‌ పతాకంపై పదర్తి పద్మజ నిర్మించిన ఈ సినిమాను గతేడాది ఏప్రిల్ లో విడుదల చేసారు. అయితే క‌థ‌లో కొత్త‌ద‌నం మిస్స‌వ్వ‌డం, హారర్ ఎలిమెంట్స్ పెద్దగా ప్రేక్ష‌కుల్ని భ‌య‌పెట్ట‌లేక‌పోవ‌డంతో త‌మిళంతో పాటు తెలుగులోనూ ఈ మూవీ డిజాస్ట‌ర్‌గా మిగిలింది. దీనితో ఓటీటీ రిలీజ్ గురించి ఎవ్వరూ పెద్దగా పట్టించుకోలేదు.
అయితే ఈ సినిమా విడుదలై ఏడాది కావస్తున్న సందర్భంగా చిత్ర యూనిట్ ఈ సినిమాను ఓటీటీలో రిలీజ్ చేస్తున్నట్లు ప్రకటించింది. ప్రముఖ ఓటీటీ ప్లాట్ ఫాం ఆహా వేదికగా ఈ సినిమాను ఏప్రిల్ 9 నుండి స్ట్రీమింగ్ కు అందుబాటులో ఉంచనున్నట్లు చిత్ర యూనిట్ ప్రకటించింది. దీనితో థియేటర్లలో ‘కాజల్ కార్తీక’ ను చూడటం మిస్సైన అభిమానులు ఓటీటీ రిలీజ్ కోసం ఆశక్తిగా ఎదురుచూస్తున్నారు. ప్రస్తుతం కాజల్ అగర్వాల్(Kajal Aggarwal)… తెలుగులో సత్యభామ సినిమా చేస్తోంది. లేడీ ఓరియెంటెడ్ క‌థాంశంతో తెర‌కెక్కుతోన్న ఈ మూవీలో పోలీస్ ఆఫీస‌ర్‌ గా కాజల్ క‌నిపించ‌బోతున్న‌ది. అఖిల్ ద‌ర్శ‌క‌త్వం వ‌హిస్తున్నాడు. సత్యభామ మూవీతో పాటు కమల్ హాసన్ హీరోగా శంకర్ తెరకెక్కిస్తున్న ఇండియన్ 2 సినిమాలతో బిజీగా ఉన్నారు.
Kajal Aggarwal – ఆంథాల‌జీ మూవీగా ‘కాజల్ కార్తీక’ !
లాక్‌డౌన్ బ్యాక్‌ డ్రాప్‌ లో మొత్తం ఐదు క‌థ‌ల‌తో ఈ హారర్ సినిమాను తెర‌కెక్కించారు దర్శకుడు డీకే. ప్ర‌తి క‌థ‌ను రెజీనా క్యారెక్ట‌ర్ ద్వారా ప‌రిచ‌యం అవుతుంటాయి. ఈ సినిమాలోని మొద‌టి క‌థ మీరాది (రైజా విల్సన్). లాక్‌డౌన్ కార‌ణంగా మీరా ఇళ్లు ఖాళీ చేయాల్సివ‌స్తుంది. శ‌క్తి (క‌లైయ‌రాస‌న్‌)అనే యువ‌కుడు త‌న ఇంట్లో ఆమెకు ఆశ్ర‌యం క‌ల్పిస్తాడు. శ‌క్తి హంత‌కుడ‌ని తెలియ‌డంతో అత‌డి అపార్ట్‌మెంట్‌నుంచి పారిపోయే ప్ర‌య‌త్నం చేస్తుంది మీరా. కానీ శ‌క్తి ఆమెను బంధిస్తాడు. మీరాను చంపేయాల‌నుకుంటాడు. ఐదేళ్ల క్రిత‌మే మీరా చ‌నిపోయింద‌నే నిజం అత‌డికి తెలుస్తుంది. మీరా ఎవ‌రు? అన్న‌దే ఫ‌స్ట్ క‌థ…
లాక్‌డౌన్ టైమ్‌లో ఇంట్లో చిక్కుకుపోయిన కాజల్ (జనని అయ్య‌ర్‌) ఓ యూట్యూబ్ వీడియో చేస్తుంది. ఆ వీడియోలో ఆమె వెనుక ఓ వ్య‌క్తి క‌నిపిస్తాడు. ఆమెను భ‌య‌పెడ‌తాడు. అత‌డు ఎవ‌రు? కాజల్ ఇంట్లోకి అత‌డు ఎలా వ‌చ్చాడు? అన్న‌ది రెండో క‌థ. లాక్‌డౌన్ టైమ్‌లో మందు కోసం ఓ సీక్రెట్ బార్‌లో అడుగుపెట్టిన ఇద్ద‌రు స్నేహితుల‌కు బంధాల విలువ‌ను ఎలియ‌న్స్ ఎలా గుర్తుచేశార‌న్న‌ది మ‌రో క‌థ.
శృతి ఓ సింగ‌ర్‌. ఓ సినిమా పాట పాడ‌టం ఫేమ‌స్ మ్యూజిక్ డైరెక్ట‌ర్ సిద్దార్థ్ అభిమ‌న్యు స్టూడియోకు వ‌స్తుంది. ఆ స్టూడియోలో శృతికి వింత మ‌న‌షులు క‌నిపిస్తారు. సిద్ధార్థ్ అభిమ‌న్యు అప్ప‌టికే చ‌నిపోయాడ‌నే నిజం తెలుస్తుంది. ఆ త‌ర్వాత ఏం జ‌రిగింద‌న్న‌ది నాలుగో క‌థ.
కార్తిక (కాజల్ అగర్వాల్(Kajal Aggarwal)) భ‌ర్త ఆర్మీలో ప‌నిచేస్తుంటాడు. కూతురు ఉమాయిల్ తో క‌లిసి ప‌ల్లెటూరిలో ఉంటుంది కార్తిక. ఆ ఊరిలో వ‌రుస‌గా చిన్న‌పిల్ల‌లు మాయ‌మ‌వుతుంటారు. కొంద‌రు పెద్ద‌లు హ‌త్య‌కు గుర‌వుతుంటారు. ఆ మ‌ర్డ‌ర్స్‌కు కార్తిక‌నే కార‌ణ‌మ‌ని నింద మోపి హ‌త్య చేస్తారు? ఆ త‌ర్వాత ఏం జ‌రిగింద‌న్న‌ది ఐదో క‌థ. ఈ ఐదు క‌థ‌ల‌ను క‌లుపుతూ మ‌రో స్టోరీగా రెజీనా ట్రాక్ న‌డుస్తుంది.
Also Read : Tillu Square : ‘టిల్లు స్క్వేర్’ టీం ను ప్రశంసలతో ముంచెత్తిన చిరంజీవి